點解？

地點：巴士上

主角：正在歸家途上的媽媽

媽媽剛從學校取回桐桐的成績表，在話筒跟爸爸報告完畢。這學期桐桐雖然名次是跌了一點，不過平均成績卻是進步了。奈何，一場H1N1，連試也未考完便提早放暑假，桐桐就是有能力後來居上也沒機會了。只是，媽媽心裏就是不憤，於是拿起手提電話……

「喂？桐桐？係咪桐桐？你知唔知道你常識好低分？好多題都答錯晒！點解會咁？你話我知，點解？長江、黃河、珠江，應該響中國地圖邊個部份？你話我知，你係咪應該識晒？咁點解仲會答錯晒？小麥可以響南方種嘅咩？原來南方都可以種小麥架？吓？你話我知。我明明同你溫左兩個禮拜，所有野都背到熟晒，點解考試先黎唔識答？點解？我問你點解呀，答我！…唔知？你而家先黎話唔知？我話你知，我就黎番到屋企，你而家好坐定定諗清諗楚，等我番黎俾個合理解釋俾我！無可能溫到熟晒都會答成咁！哦，我知嘞，一定係個電視作怪啦，咁等我番黎我打爛個電視機去，等大家都無電視睇，一拍兩散啦，好唔好？…唔好？咁你考成咁，我唯有一拍兩散咋喎，打爛佢大家都無電視睇囉，咁可能會好D啩？我唔知你，我而家就要落車嘞，我番黎再同你講…」

後記：以上獨白式的對話內容，摘自小美一次尋常的巴士旅程上的耳聞（她坐在我的後面，所以沒有目睹）。小美邊聽邊嘆——我們常常鼓勵親子溝通，而這一代的家長似乎都的確比上一代的家長樂於跟子女溝通。可是，如果以上對話也算是親子溝通，那麼，或者有時候沉默會來得更有教育意義。